Экономикаға арналған ағылшын тілі: Ынтымақтастық пен инновациялар негізінде даму
2025 жылғы 23–24 тамызда Астанада C5+O.N.E. (Opening Networks through English) бағдарламасы ұлттық деңгейдегі мұғалімдерге арналған тренинг өткізді. Екі күндік оқыту ұстаздарды 1 қыркүйектен басталатын бесінші когортаның « Экономикаға арналған ағылшын тілі» сабақтарына дайындады. Тренинг ағылшын тілін үйретуде жаңа әдістер мен құралдарды меңгеруге, түрлі салалардағы ынтымақтастықты дамытуға және аймақтық байланыстарды нығайтуға бағытталды. Шараға Астана, Алматы, Ақтау, Атырау және Павлодар қалаларынан 18 мұғалім қатысты.
Тренингте бағдарлама саясаты, талаптары және тиімді оқыту әдістері кеңінен қарастырылды. Шара АҚШ-тың Қазақстандағы миссиясы өкілдерінің құттықтау сөздерімен басталды. Қатысушыларға уақытша сенімді өкіл Дебора Робинсон, қоғаммен байланыс жөніндегі офицер Тимоти Гибсон, ағылшын тілі маманы Ольга Петерова және ағылшын тілі үйлестірушісі Алима Абдулатиф сөз сөйледі. Спикерлер мұғалімдерге арналған Елшілік ресурстарын таныстырып, кәсіби дамуға мүмкіндік беретін бағдарламалар мен онлайн оқу платформалары туралы айтты.
Екі күн бойы қатысушылар практикалық әрі шабыт беретін көптеген тақырыптарды талқылады. Олардың ішінде сторителлинг пен фотосурет, сонымен қатар білім алушылардың ынтасын сақтауға көмектесетін андрагогика қағидаттарын және әлеуметтік-эмоциялық оқытуды қолдану болды.
Мұғалімдер сонымен бірге нақты сынып үлгілеріне негізделген бағалау тәсілдерін, оқу бағдарламасының қарқынын және Voices оқулығы сияқты арнайы мақсаттарға арналған ағылшын тілі (ESP) ресурстарын зерттеді. Сессияларда сабақтарды білім алушыларға барынша бағыттаудың және сынып топтарын сенімді басқарудың маңызы атап өтілді.
Әрбір жаңа когортамен бірге C5+O.N.E. бағдарламасы мұғалімдердің әлеуетін арттырып, студенттерге жаңа мүмкіндіктер аша береді. Бағдарлама тек ағылшын тілін меңгерумен шектелмей, ортақ өркендеуге және АҚШ пен Орталық Азия арасындағы берік байланыстарға негіз болатын маңызды дағдыларды және аймақтық ынтымақтастықты дамытуға бағытталған.
Бұл тренингтер тек саясат немесе талаптар туралы ғана емес – олар қауымдастық құру, кәсіби даму және бірге сыныптарда, Қазақстан бойынша және бүкіл аймақта ұзақ мерзімді нәтижелерге қол жеткізуге деген ортақ сенім туралы.
